ডিজিটেল সংবাদ,চৰাইদেউঃ চৰাইদেউ জিলাৰ এগৰাকী অক্লান্ত পৰিবেশ কৰ্মীয়ে নিৰৱে প্ৰকৃতিৰ সংৰক্ষণৰ হকে নিৰৱচ্ছিন্ন ভাৱে কাম কৰি এক অনুকৰণীয় আদৰ্শ দেখুৱাই সকলোৱে দৃষ্টি আকৰ্ষণ কৰিছে ৷ নীৰৱে সেউজ বিপ্লৱ গঢ়ি তোলা এই গৰাকী প্ৰকৃতি সেৱক নাম হ'ল ধৰ্মেশ্বৰ কোঁৱৰ ৷ চৰাইদেউ জিলাৰ চুকাফা নগৰৰ নিবাসী তথা আদৰ্শ শিক্ষক, বিশিষ্ট সমাজকৰ্মী,বিভিন্ন সন্মানেৰে বিভূষিত ধৰ্মেশ্বৰ কোঁৱৰে ছাত্ৰ অৱস্থাৰ পৰাই পৰিবেশ সংৰক্ষণ প্ৰতি গুৰুত্ব দি আহিছিল ৷
১৯৯৩ চনত শিক্ষকতাৰে চাকৰি জীৱনৰ পাতনি মেলা কোঁৱৰে নিজৰ গৃহৰ ভূমিত বিভিন্ন ফলমূলৰ গছপুলি ৰোপণ কৰা লগতে পৰিয়ালৰ সদস্যৰ জন্মদিনটো ৰাজহুৱা স্থানত বৃক্ষৰোপণ কৰি নিজাৰ প্ৰচেষ্টাত প্ৰতিপাল কৰি আহিছিল ৷ তেওঁ ২০০০ চনৰ পৰা নিৰৱচ্ছিন্ন ভাৱে শিক্ষানুষ্ঠান,ধৰ্মীয় অনুষ্ঠান,ৰাজপথ দাঁতিত, ঐতিহাসিক স্থানৰ লগতে উৎসৱ- অনুষ্ঠানত আদিত কোঁৱৰে দুই লক্ষাধিককৈ অধিক বিভিন্ন প্ৰজাতিৰ মূল্যৱান গছপুলি ৰোপন আৰু বিতৰণ কৰি আহিছে ৷
শিক্ষকতা দৰে অত্যন্ত দায়িত্বপূৰ্ণ বৃত্তি জড়িত হৈ থকা মাজতে ৰোপণ কৰা গছপুলি সমূহ নিজৰ গাঁথিৰ ধন ব্যয় কৰি সেইবোৰ আপডাল প্ৰতিপালন কৰি আহিছে ৷ প্ৰকৃতিসেৱক ধৰ্মেশ্বৰ কোঁৱৰে বিশ্ব পৰিৱেশ দিৱসৰ দিনটো চলা গ্ৰাম্য অভৰাৰণ্য স্থানীয় ৰাইজে উদ্যোগত গ্ৰহণ কৰা পাঁচ হেজাৰ গছপুলি ৰোপণ কাৰ্য্যসূচীত অংশগ্ৰহণ কৰি পাঁচ শ বিভিন্ন প্ৰজাতিৰ গছপুলি উদ্যোক্তাক আগবঢ়াই ৷
ইয়াৰ উপৰিও তেওঁ মথুৰাপুৰ জুনিয় কলেজ, মথুৰাপুৰ শংকৰদেৱে শিশু নিকেতন, মথুৰাপুৰ মছজিদ আৰু চৰাইদেউ পৰ্বত বাগিচাৰ গছপুলি ৰোপণ লগতে বিতৰণ কৰে ৷ প্ৰকৃতিপ্ৰেমী ধৰ্মেশ্বৰ কোঁৱৰৰ এনে প্ৰশংসনীয় পদক্ষেপ নিশ্চিত ভাৱে সকলোৱে বাবে এক আদৰ্শ হৈ পৰিছে।
