ডিজিটেল সংবাদ, শিলচৰঃ আজি বিশ্ব পৰিবেশ দিৱস ৷ অসম চৰকাৰৰ উদ্যোগত আজি কেন্দ্ৰীয় ভাবে শিলচৰত পালন কৰা হব বিশ্ব পৰিবেশ দিৱস ৷ মুখ্যমন্ত্ৰী সৰ্বানন্দ সোণোৱালে মুখ্য অতিথি হিচাপে অংশগ্ৰহণ কৰিব এই অনুষ্ঠানত ৷ মুখ্যমন্ত্ৰীৰ লগতে বনমন্ত্ৰী পৰিমল শুক্লবৈদ্য, গ্ৰামোন্নয়ণ মন্ত্ৰী নৱ দলে সহ কেবা গৰাকী শীৰ্ষ বিষয়া উপস্থিত থাকিব বিশ্ব পৰিবেশ দিৱসৰ কাৰ্যসূচীত ৷
শিলচৰ পুলিচ পেৰেড গ্ৰাউণ্ডত দিন জোৰা কাৰ্যসূচীৰে উদযাপিত হব লগা বিশ্ব পৰিবেশ দিৱসত ৫০ লাখ গছপুলি ৰোপনৰ এক কাৰ্যসূচীৰ উদ্ধোধন কৰিব মুখ্যমন্ত্ৰী সৰ্বানন্দ সোণোৱালে ৷ সমগ্ৰ কাছাৰ জিলাত কাৰ্যকৰী হোৱাকৈ এই গছপুলি ৰোপনৰ ব্যৱস্থী লৈছে ৰাজ্য চৰকাৰে ৷
এমাহৰ ভিতৰত জিলা খনৰ স্কুল কলেজ, গাওঁ পঞ্চায়ত, চৰকাৰী কাৰ্যলয় সহ সকলো অনুষ্ঠানক সামৰি এই ৫০ লাখ গছপুলি ৰোপন কৰাৰ লক্ষ্য স্থিৰ কৰিছে বন বিভাগে ৷ বিশ্ব পৰিবেশ দিৱসৰ লগত সংগতি ৰাখি পুলিছ পেৰেড গ্ৰাউণ্ডত বিভিন্ন স্কুলৰ ছাত্ৰছাত্ৰী সকলৰ দ্বাৰা প্ৰস্তুত কৰা বিভিন্ন সামগ্ৰীৰ এক প্ৰদৰ্শনীৰো আয়োজন কৰা বুলি জানিবলৈ দিয়ে উপায়ুক্ত শ্ৰীমতী লায়া মাদ্দুৰীয়ে।