ডিজিটেল ডেস্কঃ দীপাৱলীৰ সময়ত চকলেট বোমা ফুটাবলৈ গৈ হাত পোৰা, ভৰি পোৰা, ৰকেট বোমা উৰি গৈ ঘৰৰ ছাঁদত পৰি অগ্নিকাণ্ড সংঘটিত হোৱা আদিৰ দৰে ঘটা প্ৰায়ে সংঘটিত হোৱা দেখা যায়৷ আনকি দীপাৱলীৰ সময়তে জুয়ে পুৰি বা বোমা ফুটি প্ৰাণহানি হোৱাৰ দৰে ঘটনাও বিৰল নহয়৷ সেইসমূহ নিতান্তই দুৰ্ঘটনা৷
কিন্তু উত্তৰপ্ৰদেশৰ যি ঘটিল, সেয়া মৰ্মান্তিক আৰু ভয়ংকৰ বুলি ক'লেও যেন কম নহয়৷ এটি তিনি বছৰীয়া শিশুৰ মুখত চকলেট বোমা সুমুৱাই জুই লগাই দিয়ে এটি কিশোৰে৷ ফলত মুখৰ ভিতৰতে সেই বোমা ফুটি এতিয়া জীৱন মৃত্যুৰ সৈতে যুঁজিছে শিশুটিয়ে৷
দেশৰ বিভিন্ন প্ৰান্তত মঙলবাৰৰ পৰাই দীপাৱলীৰ আনন্দ উল্লাসৰ ধল নামিছিল৷ উত্তৰপ্ৰদেশৰ মেৰঠতো মঙলবাৰৰ পৰাই আৰম্ভ হৈছিল দীপাৱলীৰ উছাহ৷ মঙলবাৰে সন্ধিয়া ঘৰৰ কাষতে অন্য শিশুৰ সৈতে তিনি বছৰীয়া শিশুটিয়েও দীপাৱলীৰ আনন্দত খেলি আছিল৷ সেই সময়তে ওচৰৰে হৰপালক নামৰ এজন কিশোৰ আহি শিশুটিৰ মুখত এটা চকলেট বোমা ভৰাই দি জুই লগাই দিয়ে৷ ইফালে এই কাণ্ড সংঘটিত কৰিয়েই পলায়ন কৰে কিশোৰজনে৷
পিছত স্থানীয় লোক আৰু শিশুটিৰ পৰিয়াল ঘটনাস্থলীত উপস্থিত হৈ গুৰুতৰভাৱে আহত শিশুটিক ততাতৈয়াকৈ চিকিৎসালয়লৈ লৈ যায়৷ মুখৰ ভিতৰতে বোমাটো ফুটাৰ ফলত শিশুৰ মুখমণ্ডলত যথেষ্ট আঘাত লাগে৷ চিকিৎসালয়ৰ সূত্ৰই জনোৱা মতে, শিশুটিৰ জিভাখন চিঙি যোৱাৰ লগতে তালু আৰু মুখত কেইবাটাও ছেদৰ সৃষ্টি হৈছে৷ শিশুটিৰ অৱস্থা অতি সংকটজনক বুলিও জানিব পৰা গৈছে৷
আনহাতে আহত শিশুটিৰ পিতৃ শশী কুমাৰে ঘটনা সন্দৰ্ভত আৰক্ষীৰ ওচৰত অভিযোগ দাখিল কৰিছে৷ শিশুটিৰ পিতৃৰ অভিযোগৰ ভিত্তিত আৰক্ষীয়ে ঘটনা সন্দৰ্ভত তদন্ত চলাই অভিযুক্ত হৰপালক নামৰ কিশোৰজনক বিচাৰি অভিযান আৰম্ভ কৰিছে৷ ইফালে অভিযুক্ত হৰপালকে এই ঘটনা পূৰ্ব পৰিকল্পিতভাৱে সম্পন্ন কৰিছিল নেকি সেয়া জানিবলৈও আৰক্ষীয়ে তদন্ত আৰম্ভ কৰিছে৷
