ডিজিটেল ডেস্কঃ কোকৰাঝাৰৰ অগ্ৰণী ক্ৰীড়া আৰু সাংস্কৃতিক সংস্থা এডভেন্সাৰে শেহতীয়াকৈ লাভ কৰা ঐতিহাসিক সফলতাত এতিয়া আনন্দৰ বন্যা বৈছে বড়ো ভূমিত। দুৰ্গম পথৰে এডভেন্সাৰৰ ৬ জনীয়া এটি দলে হিমাচল প্ৰদেশত যোৱা ৯ ছেপ্তেম্বৰত সফলতাৰে সমাপন কৰে ৬১১১ মিটাৰৰ পৰ্বতাৰোহণৰ যাত্ৰা। ৬ জনীয়া এই পৰ্বতাৰোহী দলটোৰ নেতৃত্বত আছিল অভিজ্ঞ পৰ্বতাৰোহী ডঃ জগদীশ বসুমতাৰী। তেওঁৰ সহযোগী হিচাপে আছিল লাঙ্গৱনা বসুমতাৰী আৰু ফুঙ্খা ব্ৰক্ষ্ম। স্মতৰ্ব্য যে, বি টি এ ডিৰ পৰা পৰ্বতাৰোহণৰ এইটো আছিল প্ৰথমটো অভিযান।
এজভেন্সাৰৰ এই ৬ জনীয়া দলটোৱে যোৱা ২ ছেপ্তেম্বৰত কোকৰাঝাৰৰ পৰা হিমাচলৰ অভিমুখে ৰাওনা হৈছিল। ৫ ছেপ্তেম্বৰত মনালীত উপস্থিত হৈ ৬ ছেপ্তেম্বৰত হিমাচলৰ ভৰতপুৰ নামৰ স্থানত প্ৰায় ১৫৬০০ ফুট উচ্চতাত পাতিছিল কেম্প। বতৰ প্ৰতি লক্ষ্য ৰাখি দলটোৱে ৮ ছেপ্তেম্বৰত প্ৰায় ১৮,১০০ ফুট উচ্চতাত শিবিৰ পাতিছিল। ৯ ছেপ্তেম্বৰৰ পুৱতি নিশা প্ৰায় ৪.৩০ বজাৰ পৰা দুৰ্গম পথৰে যাত্ৰা আৰম্ভ কৰি দিনৰ ২ বজাত দলৰ ৩ জন সদস্য উপস্থিত হৈছিলগৈ পৰ্বতৰ শিখৰত।
হিমাচলৰ পৰ্বতৰ শিখৰত থিয় হৈ দলটোৱে ৰাষ্ট্ৰীয় পতাকাৰ লগতে উৰুৱালে বড়ো সম্প্ৰদায়ৰ পৰম্পৰাগত পোছাক 'আৰণাই'। এই ঐতিহাসিৰ সফলতাৰ পাছতে ৬ জনীয়া পৰ্বতাৰোহী দলটো ১১ ছেপ্তেম্বৰত পুনৰ উপস্থিত হয় মনালীত। এই দুসাহসিক পৰ্বতাৰোহনৰ যাত্ৰাত দলটোক সহায়-সহযোগিতা আগবঢ়োৱাৰ বাবে অসম পৰ্বতাৰোহণ সংস্থা, উত্তৰ-পূব পৰ্বতাৰোহণ সংস্থাৰ লগতে বি টি চিৰ ক্ৰীড়া আৰু যুৱকল্যা বিভাগক ধন্যবাদ জ্ঞাপন কৰে।
