ডিজিটেল সংবাদ, চিলাপথাৰঃ ৰাজ্যখনৰ ২১ খন জিলাৰ দহ লক্ষাধিক বড়ো জনতাৰ উন্নয়নৰ লক্ষ্যৰে মিহিনিশ্বৰ বসুমতাৰীক মুখ্য কাৰ্যবাহী হিচাপে লৈ গঠন হ'ল ১৪ জনীয়া বড়ো কছাৰী কল্যাণ স্বায়ত্ত্ব পৰিষদ ৷ উল্লেখ্য যে স্বায়ত্ব শাসিত পৰিষদ প্ৰাপ্তিৰ গণতান্ত্ৰিক আন্দোলনৰ সমুখৰ পৰা নেতৃত্ব দি অহা মুখ্য কাৰ্যবাহী মিহিনিশ্বৰ বসুমতাৰীৰ বৰ্ণিল জীৱনৰ ওপৰত চলিছে সৰব আলোচনাই ৷ একালৰ শিক্ষক, দুৰ্ধৰ্ষ বি এল টি'ৰ কেডাৰৰ পৰা সদ্যগঠিত পৰিষদৰ মুখ্য কাৰ্যবাহীলৈ উৰ্ধমুখী যাত্ৰা কিদৰে সম্ভৱ হ'ল ইয়াকেলৈ ৰাইজৰ মাজত উত্থাপন হৈছে অলেখ প্ৰশ্ন ৷
বহু উত্থান-পতন আৰু ঘাত-প্ৰতিঘাতৰ মাজেৰে এই অৱস্থাত উপনিত হৈছে একালৰ শিক্ষক তথা সশস্ত্ৰ বিল্পৱী মিহিনিশ্বৰ বসুমতাৰী ওৰফে জাৰিমীন নাৰাজাৰী ৷ চিমেন চাপৰি সানজাৰী নৌগৰ নিবাসী বসুমতাৰীয়ে ১৯৮৩ চনত এচ বি বড়ো হাইস্কুলৰ পৰা মেট্ৰিক আৰু পৰৱৰ্তী সময়ত বঙাইগাওঁ কলেজৰ পৰা স্নাতক ডিগ্ৰী লাভ কৰে ৷ অত্যন্ত নম্ৰ, পৰোপকাৰী,অমায়িক তথা মেধা সম্পন্ন লোকজনে স্নাতক উত্তীৰ্ণ হৈ একালত অধ্যয়ন কৰা বিদ্যালয়খনত সহকাৰী শিক্ষক হিচাপে চাকৰিত যোগদান কৰে ৷
পিছে বঞ্চিত নিষ্পেষিত জনগণৰ সমস্যা চিন্তি উজাগৰী নিশা কটোৱা লোকজনে সমস্যা বহুল সমাজৰ হকে নিজা চাকৰি ত্যাগী যোগদান কৰে সশস্ত্ৰ সংগঠন বি এল টি'ত ৷ দুৰ্ধৰ্ষ কেডাৰ হিচাপে বিভিন্ন অঞ্চলত কৰ্ত্তব্যৰ অন্তত চৰকাৰে এন এচ এ'ৰ অধীনত গ্ৰেপ্তাৰ কৰি ডেৰ বছৰ কাৰাবাস দিয়ে ৷ ইয়াৰ পিছতে সম্পন্ন বড়ো চুক্তিৰ পিছত বহু কেডাৰে মূল সূঁতিলৈ উভতি আহি স্বাভাৱিক জীৱন আৰম্ভ কৰে ৷ পিছে শান্তিৰে শুই নোৱাৰিলে মিহিনিশ্বৰে ৷ নিপীড়িত বঞ্চিত প্ৰবঞ্চিত জনগণৰ উদ্ধাৰৰ আশা বুকুত বান্ধি চাকৰি পৰ্যন্ত ত্যাগ কৰি শসস্ত্ৰ সংগঠন কৰা লোকজনে ৰাইজৰ আধৰুৱা সপোন পূৰণৰ বাবে পুনৰবাৰ চিন্তাৰম্ভ কৰিলে ৷
সানজাৰী নৌগৰত প্ৰাক্তন বি এল টি কাৰ্যালয়তে একালৰ সংগ্ৰামী সতীৰ্থ আৰু শুভাকাংক্ষীক একত্ৰিত কৰি গঠন কৰে গণতান্ত্ৰিক নাগৰিক সুৰক্ষা মঞ্চ আৰু বড়ো গণ মঞ্চ ৷ বিভিন্ন মৌলিক সমস্যাৰ লগতে বি টি এ ডিৰ বাহিৰৰ দহলক্ষ লোকৰ উত্তৰণৰ বাবে এক সুকীয়া স্বায়ত্ব পৰিষদৰ দাবী জনাই আৰম্ভ কৰে নিৰবিছিন্ন আন্দোলন ৷
অৱশেষত মিহিনিশ্বৰৰ সবল নেতৃত্ব আৰু ত্যাগৰ বাবেই অৱশেষত গণ সংগ্ৰাম কৃতকাৰ্য হ'ল ৷ বি টি এ ডিৰ বাহিৰৰ দহ লক্ষাধিক ৰাইজৰ বাবে গঠন হল বড়ো কছাৰী কল্যাণ স্বায়ত্ব পৰিষদ ৷ সমস্যা বহুল ৰাইজৰ বাবে জীৱন উৎসৰ্গা কৰা ভাৱমুৰ্তিৰ তথা জনপ্ৰিয় ব্যক্তি মিহিনিশ্বৰৰ নেতৃত্ব জনতাৰ সপোন বাস্তৱ হব বুলি ৰাইজৰ প্ৰত্যাশা ৷