জানুৱাৰীৰ জাৰতো অন্তৰ্ৱাস পিন্ধি পাহাৰ বগাবলৈ যোৱাৰ চখে প্ৰাণ ল’লে যুৱতীৰ

5,046

ডিজিটেল ডেস্কঃ কিবা এটা নতু্ন কৰাৰ চখ সকলোৰে থাকে৷ যিটো আনে নকৰে, তেনে কিবা এটা কৰি নিজক সমাজৰ সন্মুখত প্ৰতিষ্ঠা কৰাৰ দুৰ্বাৰ হেঁপাহেৰেই সাগৰৰ বুকুত বিবাহ পাশত আবদ্ধ হৈছিল ব্ৰিটেইনৰ চান্দ্ৰা আৰু টম নামৰ প্ৰেমিক যুগলে৷ ঠিক তেনেদৰেই কিবা এটা নতুন কৰাৰ বাসনাই সৃষ্টি কৰিছে অলেখ অভিলেখৰো৷

কিন্তু এনে নতুনত্ব বিচাৰিয়েই প্ৰাণ হেৰুৱাবলগা হ’ল টাইবানৰ এগৰাকী যুৱতীয়ে৷ শীতৰ ঋতুকো আওকান কৰি গিগী ৱু নামৰ যুৱতীগৰাকীয়ে কেৱল অন্তৰ্বাস পৰিধান কৰি পাহাৰ বগাবলৈ গৈ মৃত্যুক আঁকোৱালি ল’ব লগা হ’ল৷

জানিব পৰা মতে, টাইবানৰ ৩৪ বৰ্ষীয় যুৱতী গিগী ৱুৰ চখ আছিল পৰ্বতাৰোহন কৰা৷ তেওঁ সময় উলিয়াই প্ৰায়ে পাহাৰ বগাবলৈ গৈছিল৷ অন্তৰ্ৱাস পিন্ধি পাহাৰৰ শিখৰত চেল্ফি লোৱাটোও আছিল তেওঁ চখ৷ যোৱা ১১ জানুৱাৰীত তেওঁ অকলেই পৰ্বতাৰোহণ যাত্ৰা আৰম্ভ কৰে যদিও কোনেও জনা নাছিল যে সেই পৰ্বতাৰোহণে হ’ব গিগী ৱুৰ শেষটো যাত্ৰা৷

গিগী ৱুৰ বন্ধু মহলৰ পৰা জানিব পৰা মতে, ১৯ জানুৱাৰীত এজন বন্ধুলৈ চেটেলাইট ফোন কৰি তেওঁ জনায় যে তেওঁ গুৰুতৰভাৱে আঘাত পাইছে৷ ইয়াৰ পিছতে নেশ্যনেল এয়াৰবৰ্ণ চাৰ্ভিছে গিগী ৱুৰ উদ্ধাৰৰ বাবে তিনিবাৰকৈ উদ্ধাৰকাৰী দল প্ৰেৰণ কৰে যদিও বেয়া বতৰ আৰু প্ৰচণ্ড শীতৰ বাবে উদ্ধাৰকাৰী দলে গিগী ৱুৰ সম্ভেদ উলিওৱাত সফল নহয়৷

ইফালে ঘটনাক লৈ চাঞ্চল্য বৃদ্ধি পোৱাত নেশ্যনেল এয়াৰবৰ্ণ চাৰ্ভিছে পুনৰ এটা উদ্ধাৰকাৰী দলক গিগী ৱুৰ সম্ভেদ বিচাৰি প্ৰেৰণ কৰাত টাইবানৰ নেশ্যনেল পাৰ্কৰ সমীপত যুৱতীগৰাকীৰ দেহ বৰফৰে ঢকা অৱস্থাত উদ্ধাৰ হয়৷

মৰোণত্তৰ পৰীক্ষাৰ পিছত চিকিৎসকে জানিবলৈ দিয়া মতে, অত্যাধিক শীতৰ বাবেই গিগী ৱুৰ মৃত্যু ঘটে৷ পাহাৰ যাত্ৰাৰ সময়ত তেওঁ দেহত সামান্য আঘাত পাইছিল, কিন্তু জাৰৰ বাবে সেই আঘাত বৃদ্ধি পায়৷ আনহাতে কেৱল অন্তৰ্ৱাস পিন্ধিয়েই শীতক নেওচি পাহাৰ বগাবলৈ কৰা চেষ্টাৰ ফলতে গিগী ৱুয়ে প্ৰাণ হেৰুৱাব লগা হয় বুলি চিকিৎসকে জানিবলৈ দিয়ে৷

আপুনি পঢ়ি ভাল পাব পৰা বাতৰি