ডিজিটেল সংবাদ তেজপুৰঃ বিশ্বৰ পৰ্যটন মানচিত্ৰত সগৌৰৱেৰে জিলিকি উঠিছে শিলে কথা কোৱা নগৰী ঐতিহ্যমণ্ডিত তেজপুৰৰ অনুপম প্ৰাকৃতিক সৌন্দৰ্য আৰু নৈসৰ্গিক পৰিবেশৰে আৱৰি থকা ভোমোৰাগুৰি আৰু মহাবাহু ব্ৰহ্মপুত্ৰৰ নদী পৰ্যটন ক্ষেত্ৰ । ইমানেই নহয় ভোমোৰাগুৰি পাহাৰৰ সমীপৰ পৰা গণেশ ঘাটলৈকে ব্ৰহ্মপুত্ৰৰ এলেকাত দেখা পোৱা দুস্প্ৰাপ্য প্ৰজাতিৰ শিহুয়েও ( ৰিভাৰ ডলফিন) হাজাৰ হাজাৰ দেশী বিদেশী পৰ্যটক বাৰুকৈ আৰ্কষিত কৰি আহিছে ।
এনে মনোমোহা পৰিবেশৰ প্ৰতি আকৃষ্ট হৈয়েই ভোমোৰাগুৰি নদী পৰ্যটন ক্ষেত্ৰৰ ২০১৮ -১৯ ৰ মুকলি বৰ্ষতে ২৩ সহস্ৰাধিক দেশী বিদেশী পৰ্যটকৰ আগমন ঘটিছিল । বৰ্তমান সময়ত অসমৰ অন্যতম পৰ্যটন ক্ষেত্ৰলৈ পৰিনত হোৱা তেজপুৰৰ ভোমোৰাগুৰি নদী পৰ্যটন ক্ষেত্ৰ ২০২১ – ২২ বৰ্ষৰ হেতু পৰ্যটকৰ বাবে বন বিভাগে আনুষ্ঠানিকভাৱে মুকলি কৰে । আৰম্ভনি বৰ্ষতে ২৩ সহস্ৰাধিক দেশী বিদেশী পৰ্যটকক আকৰ্ষিত কৰি এক সোণোৱালি ইতিহাস ৰচা ভোমোৰাগুৰি নদী পৰ্যটন ক্ষেত্ৰ তেজপুৰৰ বিধায়ক পৃথ্বীৰাজ ৰাভাই গাম্ভীৰ্যপুৰ্ন পৰিবেশত নাৰিকল ভাঙি আৰু ফিটা কাটি মুকলি কৰে ।
কেইবাখনো স্পীড ব'টেৰে মুকলি হোৱা ভোমোৰাগুৰি নদী পৰ্যটনৰ অংশ হিচাপে বিধায়ক পৃথ্বীৰাজ ৰাভা ,উপায়ুক্ত ভূপেশ চন্দ্ৰ দাস , মুখ্য বন সংৰক্ষক ড° অমিত চাহাই , কাজীৰঙাৰ সঞ্চালক পি শিৱ কুমাৰ ,আৰক্ষী অধীক্ষক ড° ধনঞ্জয় পি ঘণাৱট , উত্তৰ অসম বন চক্ৰৰ বন সংৰক্ষক বংকীম শৰ্মাকে ধৰি আন আন বিষয়া সকলে ভোমোৰাগুৰিৰ পৰা শিলঘাটৰ সমীপলৈকে নৌকা বিহাৰ কৰে ।