শেহতীয়া খবৰ
হিন্দু বাংলাদেশীক নাগৰিকত্ব প্ৰদানৰ বিৰোধিতাত কঁপিল শিৱসাগৰ  •  ২৭ জানুৱাৰীত ১২ ঘণ্টাৰ বাবে ৰাজ্য অচল কৰিব ৭০ সংগঠনে!  •  ২৭ জানুৱাৰীত ১২ ঘণ্টাৰ বাবে ৰাজ্য অচল কৰিব ৭০ সংগঠনে!  •  বিধানসভাত বিৰোধী আসনত বহিবলৈ অধ্যক্ষক পত্ৰ অগপৰ  •  বিধানসভাত বিৰোধী আসনত বহিবলৈ অধ্যক্ষক পত্ৰ অগপৰ  •  বিশ্বনাথ জিলাৰ নতুন উপায়ুক্ত পৱিত্ৰ ৰাম খাউণ্ডৰ কাৰ্যভাৰ গ্ৰহণ  •  শিৱসাগৰ জিলাৰ উপায়ুক্ত হিচাপে ডঃএছ লক্ষ্মণৰ কাৰ্যভাৰ গ্ৰহণ  •  নুমলীগড়ৰ ৩৯নং ৰাষ্ট্ৰীয় ঘাইপথত অচিনাক্ত গাড়ীৰ খুন্দাত নাহৰফুটুকীৰ মৃত্যু  •  বিজেপিৰ দল আৰু চৰকাৰৰ সুমতি কামনাৰে কংগ্ৰেছৰ ভাগৱত পাঠ  •  গোৱালপাৰাত ৰাভা হাছং স্বায়ত্ব শাসিত পৰিষদৰ নিৰ্বাচনত সৰ্বমুঠ ৬৫:৮১% ভোট গ্ৰহণ

সাঁচিপতীয়া শিল্পী হৰিনাৰায়ণ কোঁৱৰলৈ চৰকাৰী স্বীকৃতি, উৎফুল্লিত বটদ্ৰৱাবাসী

188

ডিজিটেল সংবাদ, বটদ্ৰৱাঃ মহাপুৰুষ শ্ৰীমন্ত শঙ্কৰদেৱে সাঁচিপাতত বিভিন্ন পুথি লিখি থৈ যোৱা একক আৰু অপূৰ্ব শিল্প কৰ্মবিধ কালক্ৰমত হেৰাই যোৱা পৰিলক্ষিত হৈছে৷ তেনে সময়তে আত্মাৰ তাড়নাত গুৰুজনাৰ জন্মস্থান দ্বিতীয় বৈকুণ্ঠ বটদ্ৰৱাতে এই শিল্পকৰ্মবিধক পুনৰুজ্জীৱিত কৰাৰ ক্ষেত্ৰত নিৰৱচ্ছিন্নভাৱে ব্ৰতী হৈছে গুৰুজনাৰ একান্ত সেৱক শিল্পী হৰি নাৰায়ণ কোঁৱৰ৷

এইগৰাকী প্ৰচাৰ বিমুখ শিল্পীলৈ এইবাৰ অসম চৰকাৰে আগবঢ়াইছে শিল্পী পেঞ্চন৷ সাংস্কৃতিক পৰিক্ৰমা বিভাগে জাৰি কৰা অধিসূচনাত আনুষ্ঠানিকভাৱে হৰি নাৰায়ণ কোঁৱৰৰ নামটো ঘোষণা কৰা হৈছে৷

উল্লেখ্য যে, পৌৰাণিক পৰম্পৰা ৰক্ষা কৰি হেঙুল হাইতাল সানি শিলিখা-গোমূত্ৰৰ মহী প্ৰস্তুত কৰি বাহঁৰ জেঙৰ কলমেৰে সাঁচি গছৰ ছাল কাটি মহাপুৰুষ গুৰুজনাৰ অনবদ্য সৃষ্টি ‘গুণমালা’ পুথিখন একক প্ৰচেষ্টাৰে লিখি উলিয়াইছে৷

কেৱল গুণমালাই নহয় বৰ্তমানলৈকে নিজৰ কষ্টোপাৰ্জিত ধন ভাঙি গুৰুজনাৰ বিৰচিত ‘ৰুক্মিণী হৰণ’, ‘গজেন্দ্ৰ উপাখ্যান’কে প্ৰমুখ্য কৰি কেইবাখনো পুথি লিখি শংকৰদেৱৰ পথ অনুসৰণ কৰি অতি সুন্দৰ আৰু সযতনে সাঁচিপতীয়া পুথিসমূহ বাসগৃহতে সংৰক্ষণ কৰিছে এইগৰাকী শিল্পীয়ে৷

বটদ্ৰৱা শ্ৰীশ্ৰী শঙ্কৰদেৱ উচ্চতৰ মাধ্যমিক বিদ্যালয়ৰ পৰা অৱসৰগ্ৰহণ কৰিয়েই হৰিনাৰায়ণ কোঁৱৰে সম্পূৰ্ণভাৱে পৌৰাণিক পদ্ধতিৰে সাঁচিপাতত লিখা আৰু সংৰক্ষণৰ কামত ব্ৰতী হৈ ইতিমধ্যে গুৱাহাটী বিশ্ববিদ্যালয়, তেজপুৰ কেন্দ্ৰীয় বিশ্ববিদ্যালয়, শ্ৰীমন্ত শঙ্কৰদেৱ বিশ্ববিদ্যালয় তথা বিভিন্ন অনুষ্ঠানৰ আমন্ত্ৰণ ক্ৰমে গৱেষক, ছাত্ৰ-ছাত্ৰীক প্ৰশিক্ষণ প্ৰদান কৰাৰ লগতে বিভিন্ন ঠাইত অনুষ্ঠিত কৰ্মশালাতো চৰকাৰীভাৱে প্ৰশিক্ষকৰ দায়িত্ব পালন কৰি আহিছে৷

শংকৰদেৱৰ বিৰচিত অংকীয়া ভাওঁনাসমূহত নাৰদৰ ভাওঁ দি ইতিমধ্যেই সমাদৃত ভগৱান প্ৰদত্ত হস্তাক্ষৰৰ গৰাকী এইগৰাকী ব্যক্তিক শিল্পী পেঞ্চনৰ যোগেদি চৰকাৰীভাৱে আগবঢ়োৱা স্বীকৃতি তথা সন্মানৰ বাবে সমগ্ৰ বটদ্ৰৱাবাসীয়ে অসম চৰকাৰক ধন্যবাদ জ্ঞাপন কৰিছে৷

আপুনি পঢ়ি ভাল পাব পৰা বাতৰি