ডিজিটেল সংবাদ, গৰৈমাৰীঃ কামৰূপ জিলাৰ ছয়গাঁও থানাৰ ভাৰপ্ৰাপ্ত আৰক্ষী বিষয়া কপিল পাঠকে গোপন খবৰৰ ভিত্তিত বুধবাৰে নিশা জোৰশিমুলীৰ হাঁহচৰীত অতৰ্কিতভাৱে অভিযান চলাই নিষিদ্ধ ড্ৰাগছসহ সৰবৰাহকাৰী এটাক গ্ৰেপ্তাৰ কৰিবলৈ সমৰ্থ হয়৷ জানিব পৰামতে ছয়গাঁও থানাৰ ভাৰপ্ৰাপ্ত আৰক্ষী বিষয়া কপিল পাঠকৰ নেতৃত্বত জোৰশিমুলী আৰক্ষীৰ সহযোগত বুধবাৰে নিশা হাঁহচৰীত নিষিদ্ধ ড্ৰাগছৰ বিৰুদ্ধে অতৰ্কিত অভিযান চলায়৷
আৰক্ষীৰ অভিযানকালত জোৰশিমুলীৰ হাঁহচৰীত বিক্ৰী কৰি থকা অৱস্থাত ১০ টা কণ্টেইনাৰত থকা ১৩.৫ গ্ৰাম নিষিদ্ধ ড্ৰাগছ, এটা ম'বাইল হেণ্ডছেট, নগদ ৩,৮৮০ টকাৰ সৈতে এ এছ-০১ ই এছ-৯১৫৭ নম্বৰৰ স্কুটী, দুটা মেচিনসহ সৰবৰাহকাৰী এটাক হাতে-লোটে ধৰা পেলাবলৈ সক্ষম হয়৷ ধৃত কুখ্যাত ড্ৰাগছ সৰবৰাহকাৰী বকো সমষ্টিৰ সোণতলীৰ বৰ আৰিকাটিৰ মোৱাৰক হুছেইন বুলি জানিব পৰা গৈছে৷ ধৃত কুখ্যাত ড্ৰাগছ সৰবৰাহকাৰী মোৱাৰক হুছেইনক ছয়গাঁও আৰক্ষীয়ে বৃহস্পতিবাৰে আদালতৰ জৰিয়তে জে'ল-হাজোতলৈ প্ৰেৰণ কৰা বুলি জানিব পৰা গৈছে৷