ডিজিটেল সংবাদ, অভয়াপুৰীঃ অভয়াপুৰীৰ নয়াগাঁৱত ৰাষ্ট্ৰীয় ঘাইপথত সোমবাৰে নিশা ১০মান বজাত সংঘটিত হয় এক ৰহস্যজনক পথ দুৰ্ঘটনা। দুৰ্ঘটনাত এজন লোক থিতাতে নিহত হোৱাৰ লগতে আন তিনিজন গুৰুতৰভাৱে আহত হয় ৷ জানিব পৰা মতে, এখন এএছ০১-কিউ-১৩৪৭ নম্বৰ প্লেট থকা হুণ্ডাই গাড়ীক এক বিশেষ সূত্ৰৰ পম খেদি গোৱালপাৰা আৰক্ষীয়ে গোৱালপাৰাৰ পৰা খেদি আহিছিল৷
আৰক্ষীয়ে পিছ লোৱা অনুমান কৰি তীব্ৰ বেগত বঙাইগাঁও দিশেৰে পলায়ন কৰে৷ কিন্তু নয়াগাঁৱ শিৱমন্দিৰৰ তাতে থকা এটা কেঁকুৰী ঘূৰাব নোৱাৰি ৰাস্তাত থকা প্ৰকাণ্ড মাটিৰ দ'ম এটাত খুন্দা মাৰি প্ৰায় ৩০ ফুট দূৰলৈ গাড়ীখন চিটিকি যায়৷ ফলত ঘটনাস্থলীতে এজনৰ মৃত্যু হয়৷ ইফালে, নিহত লোকজনৰ নাম আয়নুল হ'ক বুলি জানিব পৰা গৈছে৷
আনহাতে, গুৰুতৰভাৱে আহত হয় মুছা আলী, মুক্তাৰ আলী আৰু বজলুৰ আলী৷ ইপিনে এই ঘটনাক কেন্দ্ৰ কৰি সৃষ্টি হৈছে ৰহস্যৰ৷ দুৰ্ঘটনাগ্ৰস্ত বাহনখনে নৰনাৰায়ণ সেতুত পঞ্চৰত্ন আৰক্ষী আৰু যোগীঘোপাত যোগীঘোপা আৰক্ষীৰ বাধা নামানি তীব্ৰবেগত বঙাইগাঁৱৰ দিশেৰে পলায়নৰ চেষ্টা কৰিছিল৷ বাহনখনত মহিলাৰ বেগ তথা অলংকাৰ উদ্ধাৰ কৰা ঘটনাই সৃষ্টি কৰিছে আন এক ৰহস্য৷ কিয়নো বাহনখনত নাছিল কোনো মহিলা আৰোহী৷ এয়া ডকাইতৰ বাহন নে অপহৰণকাৰীৰ বাহন সেয়া বৰ্তমানেও জানিব পৰা হোৱা নাই৷
ইফালে, এক গোপন সূত্ৰৰ পমখেদি জানিব পৰা মতে, গোৱালপাৰাৰ আগিয়াৰ টকৰপাৰাত এখন বাহনে এহাল মাক-জীয়েকক অপহৰণৰ চেষ্টা চলাইছিল যদিও চিঞৰ-বাখৰ কৰাত বাহনখন বঙাইগাঁও দিশত পলায়ন কৰিছিল৷ অপহৰণৰ চেষ্টা চলোৱা দলটোও হ'ব পাৰে বুলি আৰক্ষীয়ে সন্দেহ কৰিছে৷