বৰ্ণিল হৈ পৰিছে ডিফুৰ তাৰালাংছ’ত অনুষ্ঠিত ৪৫ তম কাৰ্বি যুৱ মহোৎসৱ, চাওক VIDEO

বৰ্ণিল হৈ পৰিছে ডিফুৰ তাৰালাংছ’ত অনুষ্ঠিত ৪৫ তম কাৰ্বি যুৱ মহোৎসৱ, চাওক VIDEO

ডিজিটেল সংবাদ, বটদ্ৰৱাঃ ১৯৭৮ বৰ্ষতে আৰম্ভ হোৱা উত্তৰ-পূৱ ভাৰতবৰ্ষৰ প্ৰথম যুৱ মহোৎসৱটিত সমূহ কাৰ্বি যুৱ সমাজ একত্ৰিত হৈছিল ৷ সেই বৰ্ষটো নিশ্চিতভাৱে কাৰ্বিসকলৰ বাবে এটা উল্লেখনীয় বছৰ বুলিব পাৰি ৷ কাৰ্বি আংলং জিলাৰ সদৰ ডিফুত প্ৰথম অনুষ্ঠিত হৈছিল যুৱ মহোৎসৱ ৷ আৰম্ভ হোৱা তিনি বছৰৰ পাছত অৰ্থাৎ ১৯৭৭ চনত জন্ম হোৱা 'কাৰ্বি সাংস্কৃতিক সমাজ'এ তেতিয়াৰ পৰা প্ৰতি বছৰে নিয়মীয়াকৈ 'কাৰ্বি যুৱ মহোৎসৱ'ৰ মুখ্য উদ্যোক্তা দায়িত্ব বহন কৰি আহিছে ৷

প্ৰতি বছৰৰ দৰে কাৰ্বিসকলৰ ঐতিহ্য আৰু সংস্কৃতিৰ ধ্বজা বহন কৰি অহা মহোৎসৱখনি এইবাৰো জিলাখনৰ তাৰালাংছ'ত অনুষ্ঠিত হৈছে ৷ সৰ্বমুঠ ১০৮৬ বিঘা মাটিৰে আগুৰি থকা বিশাল এলেকাৰ স্থায়ী মহোৎসৱস্থলীৰ সেউজ পৰিবেশ অতিকৈ আকৰ্ষণীয় আৰু দৃষ্টিনন্দন হৈ পৰিছে ৷ ৪৫ তম কাৰ্বি যুৱ মহোৎসৱস্থলীৰ প্ৰায় ৫টা স্থায়ী মুকলি মঞ্চ, মণ্ডপ, বিভিন্ন জনগোষ্ঠীৰ চাংঘৰ আদিয়ে প্ৰাচীন কাৰ্বিসকলৰ বৰ্ণীল ঐতিহ্য বহন কৰিছে ৷

আৰম্ভণীৰ পিছৰ পৰা বৰ্তমান এক সুকীয়া স্তৰলৈ উত্তৰন ঘটা ৪৫তম কাৰ্বি যুৱ মহোৎসৱে এইবাৰো সংস্কৃতিৰ উপৰিও শৈক্ষিক, দু:সাহসিক ক্ৰীড়া আৰু পৰম্পৰাগত ক্ৰীড়াশৈলীক এক সুকীয়া মাত্ৰা প্ৰদান কৰা পৰিলক্ষিত হৈছে ৷ এই ঐতিহাসিক কাৰ্বি যুৱ মহোৎসৱে কেৱল যুৱ প্ৰজন্মকে প্ৰতিনিধিত্ব নকৰি শিশুসকলৰ বিকাশৰ বাবেও বিভিন্ন সাংস্কৃতিক, শৈক্ষিক, চিত্ৰাঙ্কন, সাধু কোৱা আদি অনুষ্ঠান আয়োজিত কৰিছে ৷

২০১৯ বৰ্ষৰ ৪৫তম কাৰ্বি যুৱ মহোৎসৱ দুগুণ উৎসাহ উদ্দীপনাৰে ১৪ ফেব্ৰুৱাৰীৰ পৰা ১৯ ফেব্ৰুৱাৰীলৈ অয়োজন কৰা হৈছে ৷ ডিফুৰ তাৰালাংছ'ৰ বিশাল সাংস্কৃতিক ক্ষেত্ৰ এতিয়া কাৰ্বিসকলৰ বিভিন্ন নৃত্য প্ৰদৰ্শন আৰু প্ৰতিযোগিতা, সাংস্কৃতিক শোভাযাত্ৰা, পৰম্পৰাগত খেল-ধেমালী, দু:সাহসিক ক্ৰীড়া, বাঁহ-কাঠৰ সামগ্ৰী, নানাৰঙী সাজ-পোচাক, পৰম্পৰাগত খাদ্য সামগ্ৰীকে ধৰি বিভিন্ন প্ৰদৰ্শনী, বিপনী, ফেশ্বন শ্ব', সৌন্দৰ্য্য প্ৰতিযোগিতা, গীত-মাতেৰে আদিৰে মুখৰিত হৈ পৰিছে ৷

১৪ ফেব্ৰুৱাৰীত ৪৫তম কাৰ্ৱি যুৱ মহোৎসৱৰ পতাকা উত্তোলন কৰে কাৰ্বি সাংস্কৃতিক সমাজৰ সভাপতি চন্দ্ৰ ছিং ক্ৰই ৷ ইয়াৰ পিছতে ২০১৯ বৰ্ষৰ বৰ্নাঢ্য কাৰ্যসূচীসমূহৰ শুভাৰম্ভ কৰে কাৰ্বি স্বায়ত্ব পৰিষদৰ মূখ্য কাৰ্যবাহী সদস্য তুলিৰাম ৰংহাঙে ৷ সম্পূৰ্ণ কাৰ্বি ৰীতি-নীতিৰে ছয়দিনীয়া কাৰ্যসূচীৰ শুভাৰম্ভনী অনুষ্ঠানটোত কাৰ্বি জনগোষ্ঠীয় বিভিন্ন বৰ্ণিল সংস্কৃতিৰ সমাহাৰ ঘটা পৰিলক্ষিত হয় ৷

শনিবাৰে কাৰ্বি যুৱ মহোৎসৱৰ দ্বিতীয় দিনা বতৰে দিনৰ ভাগত কিছু বিধি পথালি দিয়ে যদিও বিয়লি ভাগৰ পৰা মহোৎসৱস্থলীলৈ ৰাইজৰ সোঁত বোৱা পৰিলক্ষিত হয় ৷ দিনযোৰা বিভিন্ন কাৰ্যসূচীৰ পিছত সন্ধ্যাৰ পৰা বিভিন্ন মুকলি মঞ্চত আৰম্ভ হয় ভিন ভিন প্ৰতিযোগীতা আৰু আমন্ত্ৰিত অতিথি শিল্পীৰ অনুষ্ঠান ৷ নিশা এপৰলৈকে অগণন লোকে লোকাৰন্য হৈ পৰে ডিফুৰ ঐতিহাসিক সাংস্কৃতিক পথাৰস্থলী তাৰালাংছ' ৷ সকলোৱে আনন্দ মনে শান্তি-সম্প্ৰীতিৰ বাৰ্তা বিলায় উপভোগ কৰে ৪৫তম কাৰ্বি যুৱ মহোৎসৱৰ বৰ্নাঢ্য তথা বৰ্ণীল কাৰ্যসূচী ৷

Related Stories

No stories found.
Code:
logo
Asomiya Pratidin
www.asomiyapratidin.in